Muqdisho Oo Xalay Si weyn Looga Xusay 1da Luulyo

Waxaa Xalay si w eyn Magalaada Muqdisho looga Xusay Munaasabada 1da luulyo oo ah habeen ku weyn dhamaan Umada Soomaaliyeed ,iyadoona Munaasabado tan la mid ah ay ka dheceen dalka Gudihiisa iyo weliba Dibada.

Madaxweynaha Jamhuuriyadda Soomaaliya Mudane Sheekh Shariif Sheekh Axmed oo Munaasabadda Khudbad ka jeediyey ayaa ugu horeyn shacbiga Soomaaliyeed guud ahaanba ugu hambalyeeyey Munaasabaddan  qiimaha leh waxaana uu Alle ka baryey in sanadkaan sanadkiisa uu Alle nagu gaarsiiyo Nabad,Barwaaqo iyo Hormar.

Madaxweyne Sheekh Shariif Sheekh Axmed ayaa Hambalyada guud ee uu Shacabka Soomaaliyeed u diray waxa uu hadana si gaar ah ugu hambalyeeyey Ciidammada Qalabka Sida ee Soomaaliyeed iyo kuwa Midowga Afrika oo iyagu si wadajir ah guullo ugasoo hooyey howlgallada dalka looga saarayo xarakada Al shabaab

“taariikhda Soomaaliya waa la yaqaanaa waa taariikh qoto dheer oo la wada yaqaan laakiin dad ayaa isku daya markasta iney taariikhdeena soo jireenka ah lumiyaan,dowladnimada iyo xoriyadanna kuma imaan ciyaar ciyaar dadkii dhiigga u hureyna gobanimada aan maanta ku damaashaadeyno Alle naxariistii Janno hanasiiyo”ayuu yiri Madaxweyne Sheekh Shariif Sheekh Axmed mar uu ka hadlayey taariikhda xoriyadda Soomaaliya.

Madaxweyne Sheekh Shariif Sheekh Axmed ayaa dhanka kale ka hadlay dhibaatooyinka uu dalku ku yeeshay KMGka waxaana uu tilmaamay in KMGnimadu ay shacbiga iyo Dowladda Soomaaliyeed ka hor istaagtay xuquuq badan oo ay lahaayeen waayo ma jirto ayuu yiri xitaa hal Dowlad oo caalamka ka mid ah oo heshiis buuxa kula galeysa hadii aad ku jirtid KMG.

“Marxaladda soo socota waxey noqon doontaa Insha Allah mid dalku uu dib ugusoo kabto oo aan ka gudubno KMG islamarkaana aan dib u galno marxalad dib u dhis oo lasoo celiyo hay’adihii dowliga ahaa waxaanna soo gaarnay heshiisyo noo fududeynaya inaan marxaladaas galno oo aan u gudubno la xisaabtan shacab”ayuu hadalkiisa sii raaciyey Madaxweyne Sheekh Shariif Sheekh Axmed.

Madaxweynaha oo sidoo kale ka hadlayey saameynta burburkii dalka ka dhacay ayuu tilmaamay in dhinacyada ugu badan ee uu saameeyey ay ka mid tahay Aqoontii oo ku burburtay waxaana uu xusay iney lagama maarmaan tahay in aqoon la helo si looga gudbo qabyaalad iyo maamul xumo.

Waalidiinta Soomaaliyeed ayuu ku booriyey Madaxweyne Sheekh Shariif Sheekh Axmed iney ubadkooda u horseedaan Waxbarasho oo waalid walba la doonayo inuu ka qeybqaato sidii uu ubadkiisa ugala dagaalami lahaa aqoon la’aanta ama jahliga waxaana uu intaasi raaciyey in dadka Soomaaliyeed ay yihiin dad maskax furan marka xaga Waxbarashada laga hadlayo, dowladuna ay dalal badan uga heysato fursad taageero la xiriirta Waxbarashada.

Waxa uu Madaxweyne Sheekh Shariif Sheekh Axmed baaq u diray dadka Soomaaliyeed ee dibadaha ku nool oo uu ku timaamay iney heleen fursado waxbarasho maantana uu dalkooda u baahanyahay lagana doonayo iney dib ugusoo laabtaan dalkooda hooyo si ay aqoontooda ugu faa’ideeyaan shacabkooda.

“Dadka Soomaaliyeed waa dad islaannimadu ay soo gaartay ka hor inta aysan gaarin Madiina waxyaabaha cadeynaya iney Soomaalidu diinta ku ad adagtahay ku dhaqankeeda waxaa ka mid ah Afrika ma jiro wadan 100% muslim marka laga reebo Soomaaliya,ayadoo ay taasi ay jirto ayaa dhalinyaro marin habaabsan waxey isku dayeen iney magaca diinta dadka ku dhibaateeyaan ayagoo iska dhaadhiciyey iney Soomaalidu diinta ku ad adag yihiin balse Alle mahadii waa laga guuleystay maanta”ayuu yiri Madaxweyne Sheekh Shariif Sheekh Axmed

Ugu dambeyntii Madaxweynaha Jamhuuriyadda Soomaaliya Mudane Sheekh Shariif Sheekh Axmed waxa uu fariin nabadeed u diray kuwa weli ku fekeraya iney shacabkooda sii dhibaateeyaan waxaana uu ugu baaqay iney ka faa’ideystaan fursada cusub ee ay ka mid noqdaan hormarka iyo dib u dhiska dalkooda.

Share